Ներկայացնում ենք հարցազրույցի մի հատված, որը նվիրված է It Park բիզնես կենտրոնի զարգացման հեռանկարներին, արժեքներին և նոր հնարավորություններին։ Տնօրեն Գագիկ Կարապետյանի պատասխանները կօգնեն ավելի խորը պատկերացում կազմել այն մասին, թե ի՞նչ ուղի է անցել կենտրոնը, ո՞ւր է շարժվում այժմ և ի՞նչ նպատակներ ունի ապագայի համար։

1․ Ո՞րն էր գլխավոր շարժիչ ուժը բիզնես կենտրոնը ստեղծելու համար։
– Բիզնես կենտրոնի պատմությունը սկիզբ է առել դեռևս 1976 թվականին, երբ Մոսկվայում հիմնադրվեց «ԱԼԳՈՐԻԹՄ» գիտահետազոտական կենտրոնը, որը զբաղվում էր համակարգչային ծրագրավորմամբ։ Սովետական Միության փլուզումից հետո մենք շարունակեցինք մեր գործունեությունը նույն ուղղությամբ՝ վերափոխելով կենտրոնը բիզնես միջավայրի։ Շենքը ի սկզբանե նախատեսված է եղել ծրագրավորողների աշխատանքի համար, և այսօր ևս կենտրոնում գերակշռում են ՏՏ ոլորտի մասնագետներն ու կազմակերպությունները։

2․ Որքա՞ն ժամանակ է գործում կենտրոնը, և ինչպիսի՞ աճ է ունեցել այդ ընթացքում։
— Մեր կենտրոնն ունի ավելի քան 45 տարվա պատմություն։ 2003 թվականին կենտրոնի ղեկավարության որոշմամբ իրականացվեցին արմատական, համակարգային փոփոխություններ, որոնց արդյունքում կազմակերպությունն անցավ զարգացման նոր փուլ։ Այն դարձավ փակ բաժնետիրական ընկերություն (ՓԲԸ), և ընկերության աշխատակիցները ՀՀ կառավարությունից գնեցին կազմակերպության բոլոր բաժնետոմսերը։ Այս քայլը թույլ տվեց ձևավորել անկախ կառավարման համակարգ և զարգացնել կենտրոնը նոր ռազմավարական ուղղություններով։

3․ Ինչպիսի՞ն եք տեսնում It Park բիզնես կենտրոնի զարգացումը առաջիկա տարիների ընթացքում։ Որո՞նք են գլխավոր նպատակներն այս փուլում։
— Անձամբ ես խորապես հավատացած եմ, որ մարդը միայնակ չի կարող մեծ արդյունքների հասնել․ միջավայրն է այն գործոնը, որը աջակցում է, ներշնչում և ուղղորդում։
Այսօր աշխարհը թևակոխում է արհեստական ինտելեկտի դարաշրջան, որտեղ ներդրվում են հսկայական միջոցներ։ Սա այն ուղղությունն է, որտեղ հատկապես երիտասարդ սերունդը ոչ միայն սովորում է ծրագրավորում, այլև յուրացնում է դրա նորագույն մոտեցումներն ու գործիքները։ IT Park-ում, տարբեր փոփոխություններից հետո, մենք հստակորեն տեսանք, թե որքան կարևոր է ծրագրավորման դերը։ Կարող եմ վստահությամբ ասել, որ ժամանակին մենք եղել ենք Ամերիկայի հետ առաջին պատվերներ կատարող կազմակերպություններից, և այսօր էլ շարունակում ենք զարգանալ այդ ուղղությամբ։

4․ Արդյոք նախատեսում եք ընդլայնել տարածքը կամ բացել նոր մասնաճյուղեր՝ Երևանում, ՀՀ այլ մարզերում կամ նույնիսկ արտերկրում։
-Ես միտված եմ ներդրումներ իրականացնել Հայաստանում, թեև մեծ փորձ ունեմ տարբեր երկրներում բիզնես գործունեություն ծավալելու ոլորտում։
Ներկայում աշխատում ենք ժամանակակից, միջազգային բոլոր ստանդարտներին համապատասխան նոր բիզնես կենտրոնի կառուցման ծրագրի վրա։ Այն ունենալու է շուրջ 20,000 քառակուսի մետր ընդհանուր տարածք, հագեցած կլինի կանաչ տեխնոլոգիաներով և արհեստական բանականության լուծումներով։ Նոր բիզնես կենտրոնը եզակի կառույց է լինելու ոչ միայն մեր հանրապետությունում, այլև ողջ տարածաշրջանում՝ իր հարկի տակ ընդունելով բարձր տեխնոլոգիաների, արհեստական բանականության և տեղեկատվական տեխնոլոգիաների առաջատար ընկերություններին։

5․ Ի՞նչ հիմնական մարտահրավերների եք բախվել, և ինչպե՞ս եք հաղթահարել դրանք։
-Մեր ամենախոշոր մարտահրավերներից մեկը եղել է վարչական համակարգերի անարդյունավետությունը։ Ցավոք, պետական և վարչական կառուցվածքները միշտ չէ, որ գործում են այնպես, որ աջակցեն մասնավոր ոլորտին կամ նպաստեն բիզնեսի զարգացմանը։ Այդ պայմաններում առաջ են եկել մի շարք բարդություններ, սակայն ժամանակի ընթացքում կարողացել ենք հաղթահարել այդ խնդիրները՝ համառությամբ, համբերատարությամբ և հետևողական աշխատանքի շնորհիվ։

6․ Արդյոք նախատեսում եք զարգացնել նոր ծառայություններ մոտ ապագայում։
-Այո, մոտ ապագայում նախատեսում ենք ներդնել նոր ծառայություններ, որոնցից առաջինը կլինի սպորտաբժշկական ծառայությունը։ Հաշվի առնելով, որ մեր բազմաթիվ աշխատակիցների գերակշռող մասը նստակյաց կենսակերպ է վարում, այդ ծառայության նպատակն է կանխարգելել առողջական խնդիրները և բարելավել աշխատակիցների ընդհանուր վիճակը։ Մյուս կարևոր ուղղությունը, որի վրա կենտրոնանում ենք, կապված է ապաստարանի բարելավման հետ։ Հավատում եմ, որ անվտանգ և հարմար ապաստարանը պետք է լինի առաջնահերթություն, և մենք արդեն աշխատում ենք այդ ուղղությամբ՝ ապահովելու անվտանգություն մեր բոլոր վարձակալների համար։
Շնորհակալություն անկեղծ պատասխանների և հետաքրքիր դիտարկումների համար։ Վստահ ենք, որ It Park բիզնես կենտրոնը շարունակելու է պահպանել իր առաջատար դիրքը և ստեղծել առավել նպաստավոր պայմաններ բիզնեսների զարգացման և կայացման համար։